Tryggingastofnun ríkisins
Stofnunin starfar samkvæmt lögum um almannatryggingar nr. 100/2007 og lögum um félagslega aðstoð nr. 99/2007.
Alþingi setur lög, ráðuneytin gefa út reglugerðir og úrskurðarnefnd almannatrygginga fjallar um kærur viðskiptavina stofnunarinnar. Tryggingastofnun ríksins heyrir undir félags- og tryggingamálaráðuneytið og er ein stærsta þjónustustofnun landsins. Tryggingastofnun setur ekki lög eða reglugerðir og ákvarðar ekki fjárhæðir bóta.
Frá 1. janúar 2008 hefur félags- og tryggingamálaráðuneyti umsjón með allri starfsemi Tryggingastofnunar og skipar forstjóra til fimm ára í senn. Forstjóri annast stjórn stofnunarinnar en einstök svið sjá um afgreiðslu og þjónustu.
Hlutverk stjórnar Tryggingastofnunar er skilgreint þannig að hún staðfesti skipulag stofnunarinnar, árlega starfs- og fjárhagsáætlun og marki langtímastefnu. Þá ber stjórn að hafa eftirlit með starfseminni og gæta þess að rekstur sé innan ramma fjárlaga hverju sinni.
Úrskurðarnefnd almannatrygginga tók til starfa 1. júlí 1999. Kærumál vegna afgreiðslu Tryggingastofnunar koma til úrskurðar hjá nefndinni en í henni eru þrír menn skipaðir til sex ára í senn, tveir lögfræðingar og einn læknir.
